“МАКТАБ МОБАЙЛ” – ПЛАТФОРМАИ ТАЪЛИМИ РАҚАМӢ
Бо дастури Вазорати маориф ва илми Ҷумҳурии Тоҷикистон ва бо ташаббуси МД «Маркази ҷумҳуриявии технологияи информатсионӣ ва коммуникатсия» ва дар ҳамкорӣ бо Хазинаи Кӯдакони Созмони Милали Муттаҳид (ЮНИСЕФ) рӯзҳои 14-16-декабри соли ҷорӣ дар толори Марказ семинари омӯзишӣ оид ба платформаи таълими рақамии «Мактаб мобайл» баргузор гардид. Дар он намояндагон аз Донишкадаи ҷумҳуриявии такмили ихтисос ва бозомӯзии кормандони соҳаи маориф ва филиалҳои он дар шаҳру ноҳияҳо, инчунин, директорони марказ ва бахшҳои технологияи информатсионӣ ва коммуникатсияи назди раёсат ва шуъбаҳои маорифи шаҳру ноҳияҳои ҷумҳурӣ ширкат ва фаъолият намуданд. Иштирокдорон аз ҷараёни семинар изҳори қаноатмандӣ намуда, бовар доранд, бо донишҳои нави технологӣ дар рушди мактабу маориф саҳмгузорӣ карда метавонанд.
